Tuesday, February 14, 2012

Aku ada cerita

Tadi patang, aku men-start projek hobi baruku. Andang batah pulang udah aku kan start tapi kan, dua hari beturut-turut, hujan labat saja. Yatah nda jadi. Tadi patang baruku dapat start. Sampai tunang cousinku datang pun nda ku peduli. Ku tinggalkan ja ia melayan cerita tv di astro. Yang penting, aku mesti buat jua projek ku ani. Mesti! 

Kali, keluar rumahku mencari butul plastik yang andang amahku kumpul. Ku ambil sebuting. Butul pepsi 1.5 liter. Ku cuci dalamnya sampai bersih. Ku ambil tukul sama paku dari toolbox babah. Pastu ku buat lubang arah tudung butul atu. Payah jua eh awal-awal atu. Maklum. Tangan bini-bini bukannya kuat. Ada kali 10 minit ku menukul. Dah tu, ke dapur ku. Ngambil pisau. Kunun kan mutung butul atu jadi half. Atu pun payah-payah mutung. Ahernya, pakai gunting. Lagi sanang. Setelah bertungkus-lumus menggunting, ahernya siap. Then, mencari kain lagi ku. Kain yang nda bepakai. Ku gunting. Jadi strip panjang. Lebih kurang 2 inci x 10 inci lah. Ku masukkan pat lubang tangah-tangah rah tudung butul yang ku lubangi tadi.

Pastu, keluarku mencari spade damit. Nda tecari, tanya amah. Panya ampai-ampai dapan mataku. -_-' Dengan penuh semangat, aku jalan keluar pagar. Mengaga rah tampat bakas amahku mengunun. Kan ngambil tanah masak. Syok jua mengurik-ngurik tanah ah. Kurik punya kurik, dapat tah ku tanah untuk butul ku. Yay. Oh yea, aku ada tejumpa ulat bulu warna kuning. Kiut!! Gamuk. Damit g ibu jariku. Aku cakap g tu rahnya, "ulat! kiut jua ko!!" kali ku angkat ia pakai kayu damit. Kan ku bawa ke rumah. Kan ku gambar. Tapi, alum batah ku angkat, laju ia bejalan mengaga jariku. Ku umban tarus. Sian. Tegulik pulang ia :( Tapi selamat lah ia. Marah kali ia sebab ngacau ia bejalan makan angin tadi. Hee..

Then, aku teruskan projekku. Ku ambil kaktus ku. Kan ku cabut anaknya. Cumil. Basar g jari kelingking ku. Kali, tenampak ku anak bunga lidah buaya.  Beakar sudah tapi kesian. Nda cukup tampat dalam pasu. Ahernya, aku ambil bunga atu pastu ku tanam cia rah butulku. Yay! :D Tapi kan, macam nda puas hati rasanya. Dah ku tenampak butul kusung masih banyak, ku ambil g dua buting. Kali ani, kan ku tanam anak kaktus ku sama kan menyamai biji durian. Sebab banyak bijinya di dapur ku nampak masa ku ngambil pisau tadi. Ku buat lagi barang yang sama. Nda g ku kisah bah nyamuk gigit. Yang penting, projekku siap. Si Milky mengiau kan bemanja pun nda ku peduli. Ku suruh ja ia duduk liat aku buat keraja. Merati jua ia eh. Cian...

Ada kali 20 minit, ahernya siap cia semua. Bunga kaktus sama biji durian ku tanam. :D Hepi ku. Aku cari tampat yang paling banyak kana cahaya matahari. Ku ampai 3 buting butul ku di sana. Pastu, ke dapur ku. Kan cuci tangan. Kan prepare untuk high tea lagi sama tunang cousinku. Kali masa ku di dapur ah, amahku sibuk ni mutung-mutung biji buah. Aku heran. Kali ku tanya, "Anti, apa anti putung?" Katanya mummy suruh putung biji buah tibadak, untuk dimasak. Asta!!! Ketawa ku tarus ani bah! Rupanya bukan biji buah durian yang ku tanam tadi atu. Biji buah tibadak panya!! Hahaha! Adakah patut. Mun ku nda meliat amahku mutung biji buah bah tadi, gerenti dahnya tumbuh baru ku tau apa yang ku tanam! Adui... 

Yatah namanya, a farmer in the making! Biji durian sama biji tibadak pun nda pandai membezakan...

hydroponicsdictionary.com
Ah, ani tah usulnya yang ku buat tadi. Ani bukan pulang gambarku. Tapi samalah yang ku buat. Macam ani :) Iski ku ni nunggu durang tumbuh :D :D Nanti tah ku post gambar durang dah basar ok?

No comments:

Post a Comment